29nóv.
Að matreiða ofnæmisfæði á öruggan hátt
29. nóvember 2018 – 6. desember 2018, kl. 16:30 – kl. 19:30
Menntaskólinn í Kópavogi

Astma- og ofnæmisfélag Íslands (AO) heldur námskeið um eldun ofnæmisfæðis dagana 29. nóvember og 6. desember í Menntaskólanum í Kópavogi. Bóklegi hlutinn verður haldinn fimmtudaginn 29. nóvember kl. 16:30 til 19:30 og verklegi hlutinn fimmtudaginn 6. desember kl. 16:30 til 20.30.

Markmiðið með námskeiðinu er að bjóða upp á faglega fræðslu um fæðuofnæmi, alvarleika þess og hvernig tryggja megi góða og holla næringu. Það getur verið flókið að tryggja öruggt fæði og umhverfi fyrir einstakling með fæðuofnæmi. Ljóst er að næringarefni geta orðið af skornum skammti þegar fæðuofnæmi er til staðar og felst fræðslan m.a. í því að fara yfir hvaða fæðutegundir geta komið í staðinn fyrir mjöl, korn, mjólk, egg, fisk, hnetur o.fl. til að fullnægja orku- og næringarlegum þörfum og skapa fjölbreytni í fæðu barna og fullorðinna. Verklegi hlutinn felur í sér eldun og bakstur ýmissa rétta og útfærsla uppskrifta á mismunandi máta eftir því hvaða ofnæmi er um að ræða.

Markhópur eru matreiðslumenn og matráðar í eldhúsum í leik- og grunnskólum, heimilisfræðikennarar, starfsmenn, kennarar og stjórnendur í skólum, foreldrar og forráðamenn barna og ungmenna með fæðuofnæmi, starfsfólk veitingastaða og hótela, fólk með fæðuofnæmi og aðrir sem áhuga hafa á málefninu.

Kennarar:

Fríða Rún Þórðardóttir, næringarfræðingur og næringarráðgjafi Eldhúsi Landspítala, formaður AO.

Guðný Jónsdóttir, næringarrekstrarfræðingur og kennari matartæknabraut MK

Selma Árnadóttir, varaformaður AO, ofnæmisráðgjafi og móðir ofnæmisbarns.

Skráning hér eða með tölvupósti á [email protected] með upplýsingum um nafn, kennitölu og greiðanda.

Námskeiðsgjald er 17.000 kr og er hráefnisgjald og hressing innifalin. Greiða þarf 5.000 kr. staðfestingargjald við skráningu fyrir 26. nóvember á bankareikningur: 0113-05-570194, kennitala: 590474-0109. Senda kvittun á: [email protected] (tilgreina nafn þess sem greitt er fyrir).