Stuðningsfulltrúanámskeið

  • Tímabil

    30.05.2017 - 06.06.2017

  • Almennt verð

    0 kr.
    3000 kr. afsláttur fyrir félagsmenn í aðildarfélögum SÍBS og ÖBÍ

  • Um námskeiðið

    Stuðningsnet sjúklingafélaganna - Stuðningsfulltrúanámskeið

    Stuðningsfulltrúanámskeið fyrir verðandi stuðningsfulltrúa verður haldið þriðjudagana 30. maí og 6. júní 2017 frá klukkan 17 til 21 í SÍBS húsinu að Síðumúla 6, 2. hæð. Boðið verður upp á kvöldverð.

    Stuðningsnetið byggir á fyrirmynd frá Krafti stuðningsfélagi fyrir ungt fólk sem greinst hefur með krabbamein og aðstandendur þeirra. Hópur sjúklingafélaga aðlagaði námsefni og stuðningsferlið að ólíkum sjúklingahópum. Sjúklingafélögin eru aðildarfélög SÍBS (Hjartaheill, Neistinn, Samtök lungnasjúklinga, Astma- og ofnæmisfélag Íslands, Vífill, Sjálfsvörn og Berklavörn), MS-félagið, Gigtarfélag Íslands, Parkinsonsamtökin á Íslandi, Alzheimer samtökin, Lauf félag flogaveikra, Félag nýrnasjúklinga, Samtök sykursjúkra og Tourette samtökin. Skrá þarf sjúklingafélag í athugasemdir en félögin greiða skráningargjald félagsmanna 6.000 kr.

    Umsjónarkona stuðningsnetsins, Helga Kolbeinsdóttir, mun hafa samband við skráða þátttakendur í aðdraganda námskeiðsins. Þá munu sjúklingafélögin bjóða þátttakendur tengda sínum félögum á upplýsingafund þar sem farið verður yfir þjónustu og starfsemi félaganna.

    Á námskeiðinu er m.a. veitt þjálfun í samtalstækni, að deila reynslu sinni á viðeigandi hátt og að setja mörk. Farið verður yfir ýmis málefni sem oft fylgja því að greinast og lifa með sjúkdómnum svo sem, erfiðar tilfinningar, hvar má nálgast upplýsingar, aðstoð fagaðila, samskipti í fjölskyldum og fleira.

    Leiðbeinendur eru Helga Kolbeinsdóttir og Stefanía G. Kristinsdóttir. Þá mun Ingibjörg Hjartardóttir, stuðningsfulltrúi hjá Parkinsonsamtökunum segja frá reynslu sinni. Helga Kolbeinsdóttir er guðfræðingur með reynslu sem prestur og af sálgæslu, stundar nám í fjölskylduráðgjöf og hefur lokið 60 einingum í sálfræði. Helga er starfsmaður hjá MS-félagi Íslands og Norrænu ráði MS félaga. Stefanía Kristinsdóttir er með reynslu af fullorðinsfræðslu og markþjálfun, fræðslu- og kynningastjóri SÍBS.